Umutoza w’aya makipe Dr Mosaad Elaiut yahamagaye abakinnyi 32 muri rusange, barimo abakinnyi 16 bo mu ikipe y’abagabo ndetse n’abandi 16 bagize ikipe y’abagore, bose batangiye umwiherero banakora imyitozo yabereye ku ishuri rya Green Hills.

Ugereranyije n’abakinnyi 12 kuri buri ruhande baheruka kwitabira Igikombe cy’Isi cyabereye mu Misiri hagati ya tariki 11 na 18 Ugushyingo 2023, buri kipe yaba abagabo n’abagore yiyongereyemo abakinnyi bane bashya gusa muri rusange hakazasigara abakinnyi 14 bazitabira iyi shampiyona ya Afurika.

Imyitozo yakorwaga kabiri ku munsi kuva ku wa Gatanu kugeza ku Cyumweru aho abakinnyi bahamagawe bahise basubira mu makipe baturukamo no mu bice basanzwe babamo, ari naho bakomereza imyitozo mu matsinda bitewe n’aho baturuka bakajya bahurira i Kigali buri mpera z’icyumweru hagati yo ku wa Gatanu no ku Cyumweru.

U Rwanda mu bagabo ruheruka gukina imikino Paralempike mu 2012 rufite amahirwe menshi yo kuzabona itike kuko Misiri bahangana yabonye itike mu gikombe cy’Isi giheruka kubera iwabo bityo ikaba izaza gukina iyi shampiyona idafite kinini irwanira.

Mu bagore naho u Rwanda ho rukaba rufite amahirwe menshi dore ko ruhora ruhanganye na Misiri kandi rukunda gutsinda nk’uko byagenze mu gikombe cy’Isi cya 2023 ruyitsinda imikino ibiri bahuye.

Iyi kipe kandi iheruka mu mikino Paralempike ya 2020 yabaye mu 2021 i Tokyo mu Buyapani yegukanyemo umwanya wa karindwi mu gihe kandi u Rwanda ari cyo gihugu cyabaye icya mbere muri Afurika cyitabiriye iyi mikino mu bagore.