Umukino wahuje Rayon Sport na Musanze waranzwe n’udushya

10-01-2013 - 16:53' | Ibitekerezo ( )

Ikidasanzwe cyagaragaye kuri uwo mukino warangiye Rayon isinze bigoranye ibitego 3 kuri 2 ni imyinjirize irimo akavuyo, umuvundo no kurwana kuri stade ya Muhanga, ahari amatike ya 5000, 2000 n’1000.

Abari bashinzwe kwinjiza abantu babyitwayemo nabi maze haba umuvundo mwinshi ndetse hazamo n’inkoni. Hari abavuga ko byageze aho amatike ya 2000 abayacuruza barayimana hakagurwa aya 5000 n’1000 gusa.

Akandi gashya kagaragaye ni ukuntu ubwo Musanze yatsindaga igitego cya kabiri, umwe mu bayobozi b’iyo kipe wari unicaye imbere mu myanya y’icyubahiro yajugunye icupa ry’amazi hejuru rikora ku gisenge riragaruka ryenda kwitura mu mutwe w’umwe mu bayobozi bo ku rwego rw’akarere ka Muhanga wari aho.

Ku birebana n’ikipe ya Musanze kandi, abafana bayo bari bakeya cyane ku kibuga bari bafite ikizere cyo gutsinda Rayon ndetse bakavuga ko ikipe yaje yambaye ibara rya APR kuko Rayon itinya kandi ishoborwa na APR.

Rwarutabura aryamye hasi atumva atavuga.

Mbere gato y’uko uwo mukino wabaye tariki 09/01/2013 utangira umufana ukomeye wa Rayon uzwi ku izina rya Rwarutabura yakubitiwe muri rond point yo mu mujyi wa Muhanga amera nk’uguye muri koma atumva atavuga.

Nyuma y’umukino wa 12, amakipe asanzwe ahatanira igikombe ariyo Kiyovu, AS Kigali, APR, Police na Rayon Sport yose yatsinze imikino yayo akaba anakurikiranye kuri ubwo buryo, naho AS Muhanga ikaba iza kumwanya wa nyuma.