Ni ibihembo byatangiwe i Monaco mu Bufaransa ubwo hakorwaga tombola y’amatsinda ya UEFA Champions League 2023-2024. Muri ibi bihembo, Erling Halaand yari ahanganye na mugenzi we bakinana muri Man City Kevin de Bryne ndetse na Lionel Messi wakiniraga PSG mu mwaka w’imikino ushize.

Erling Halaand w’imyaka 23 y’amavuko ni we wegukanye iki gihembo nyuma yo gufasha ikipe gutwara ibikombe bitatu mu mwaka w’imikino wa 2022-2023 birimo shampiyona y’u Bwongereza, Champions League na FA Cup kongeraho n’igikombe kiruta ibindi i Burayi (UEFA Super Cup) Man City yatwaye itsinze FC Sevilla kuri penaliti 5 kuri 4 nyuma y’uko umukino wari warangiye ari igitego 1-1.

Imibare ya Halaand ku giti cye mu mwaka w’imikino wa 2022-2023:

Champions League:

Muri iri rushanwa Erling Halaand yakinnye imikino 11 atsindamo ibitego 12 anatanga umupira umwe wavuyemo igitego.

Premier League (Shampiyona y’u Bwongereza):

Muri shampiyona y’u Bwongereza, Erling Halaand yakinnye imikino 35 atsindamo ibitego 36.

Mu marushanwa yose mu mwaka w’imikino wa 2022-2023:

Uteranyije amarushanwa yose yakinnye mu mwaka w’imikino ushize, Erling Halaand wahembwe nk’umukinnyi mwiza i Burayi,yakinnye imikino 52 muri rusange atsindamo ibitego 52.

Mu bandi bahembwe, harimo umutoza Pep Guardiola ukomoka muri Espagne ari na we utoza Halaand wahembwe nk’umutoza mwiza nyuma yo gutwara ibikombe bine birimo shampiyona, FA Cup, Champions League na Super Cup.

Uyu mutoza yegukanye iki gihembo ahigitse abatoza babiri batoza mu Butaliyani ari bo Simone Inzaghi utoza Inter yanatsinzwe na Man City ku mukino wa nyuma wa Champions League ndetse na Luciano Spalletti watozaga Napoli yaviriyemo muri ¼.

Mu bandi bahembwe, mu cyiciro cy’abagore, umutoza w’ikipe y’Igihugu y’u Bwongereza y’abagore iheruka gutsindirwa ku mukino wa nyuma w’igikombe cy’Isi 2023, Wiegman Sarina, ni we wahembwe, mu gihe umukinnyi mwiza mu bagore yabaye Umunya-Espagne ukinira FC Barcelona Bonmati Aitana.