Umushinga wo kubaka iyi stade uteganyijwe ko uzatwara miliyoni 450 mu gihe cy’imyaka 3. Mu cyiciro cya mbere cy’uyu mwaka hateganyijwe gukora ikibuga, kubaka igice cya mbere cy’aho abantu bicara (tribune) ndetse n’izindi nyubako nk’ubwiherero n’urwambariro.

Uko Stade ya Ngororero izaba imeze nyuma y’imyaka 3 y’ingengo y’imari.

Mu gihe hashize amezi 4 imirimo itangiye, ubu ikibuga ntikirakorwa ariko imirimo yo kubaka amazu atandukanye yaratangiye.

Umuyobozi w’Akarere ka Ngororero, Ruboneza Gedeon, yatanze icyizere ko mu gihe cyagenywe cy’imyaka 3 abatuye aka karere bazaba bafite sitade y’imikino itunganye.

Babaye bahisemo guhera ku zindi nyubako bakazatunganya neza ibibuga nyuma.

Mu gihe hasigaye amezi 2 ngo igice cya mbere kirangire, bigaragara ko imirimo yo gukora ikibuga ikiri kure ku buryo bidatanga ikizere ko bizagenda uko byateguwe.

Karengera Alphonse umukozi wa sosiyete y’ubwubatsi yitwa GTT BETTON, ari nawe ukuriye igikorwa cyo kubaka iyi stade yadutangarije ko bahuye n’inzitizi z’amazi menshi ari mu butaka bubakaho, ubu bakaba bakirimo kuyakamura.

Amazi ari mu kibanza ngo yadindije gukora ikibuga.

Avuga ko bahisemo kuba batangiye kubaka izindi nyubako kuko koroha kw’ubutaka kutemerera imashini bakoresha kuhagenda ahubwo zikarigita. Gusa avuga ko sosiyete akorera yiteguye kurangiriza igihe imirimo yasinyanye n’akarere, ariko ko nibakomeza guhura n’iyo mbogamizi bazabimenyesha abo bagiranye amasezerano.

Stade ya Ngororero ni umwe mu mishinga 76 izatwara miliyari 55 na miliyoni hafi 400 mu ntara y’Iburengerazuba mu gihe cy’Imyaka 3.

Ernest Kalinganire