Umunyamabanga Nshingwabikorwa w’Akarere ka Nyagatare, Hategekimana Fred, avuga ko mu karere kose amabati ya Asbestos akigaragara ku nyubako z’Ikigo nderabuzima cya Karangazi gusa.

Yongeraho ko akarere kamaze kugirana amasezerano n’abazayakuraho ku buryo batarenza Gashyantare uyu mwaka.

Agira ati “Twamaze gusinyana amasezerano na Reserve Force binyuze mu Kigo cy’Igihugu cy’Imiturire (RHA), barayakuraho. Ukwezi kwa kabiri baraba bayakuyeho rwose kuko amasezerano arahari barimo baritegura kubikora.”

Mu Karere ka Nyagatare, amabati ya Asbestos yari asakaje inyubako za Leta, cyane cyane ibigo nderabuzima n’inyubako zakoreragamo umushinga wa OVAPAM, kuri ubu inyubako nyinshi aya mabati akaba yaramaze gukurwaho.

Gahunda ya Leta ni uko umwaka wa 2022 uzarangira nta nyubako igisakaje amabati ya Asbestos kuko ngo agira ingaruka mbi ku buzima bw’abantu.