Imyambaro n’inkweto za bote byaguriwe abanyerondo b’umwuga 65 bifite agaciro k’amafaranga y’u Rwanda angana na miliyoni imwe n’ibihumbi magana atatu (1,300,000frs) naho Moto yahawe Akagari ka Taba kabaye aka mbere mu gucunga umutekano ikaba ifite agaciro k’asaga miliyoni imwe n’ibihumbi magana ane (1,438,000frs).

Umunyamabanga Nshingwabikorwa w’Umurenge wa Muhura, Rugengamanzi Steven, avuga ko kuba Akagari ka Taba kahawe Moto y’umutekano ari uko gahana imbibi n’Akarere ka Gicumbi.

Ngo kuba gahana imbibi n’Akarere ka Gicumbi na ko kakaba gahana imbibi n’igihugu cya Uganda bituma hari ibiyobyabwenge byinshi bihanyura.

Avuga ko iyi moto izafasha mu gukumira abinjiza ibiyobyabwenge mu Murenge wa Muhura n’Akarere muri rusange.

Agira ati "Aka kagari kagaragaje ko kacunze neza umutekano ariko iyi moto izarushaho kubafasha gukumira ibiyobyabwenge byinjira mu Murenge wa Muhura biturutse i Gicumbi bivuye muri Uganda."

Avuga ko amafaranga yaguze imyambaro ndetse na moto byose ari imisanzu y’abaturage b’umurenge wa Muhura.

Umuyobozi w’Akarere ka Gatsibo Gasana Richard avuga iyo umuyobozi akoreye neza umuturage na we amwitura ineza.

Ati "Ibi bitwereka urukundo abaturage badukunda, iyi myambaro n’inkweto ndetse na moto si inkunga y’abaterankunga. Uzagenda kuri iyi moto ajya amenya ko ari iyaguzwe n’abaturage. Bibe isomo ku bandi bayobozi ko iyo umuturage umukoreye ibyiza na we akwitura ineza."

Gasana Richard avuga ko ubufatanye bw’abayobozi n’abaturage bifasha mu kugera ku bikorwa byinshi bigamije iterambere.

MENYA UMWANDITSI

Emmanuel Gasana Sebasaza

Umunyamakuru

@ SEBASAZAGEmman1

Reba inkuru zose nanditse ( 1817 )