Niragire wari urwariye mu bitaro bya Gisenyi n’abana be yasezerewe n’ibitaro taliki 19/04/2013 ariko ntiyashobora gutaha kubera kubura ubushobozi bwo kwishyura amafaranga yagombaga gutanga nyuma y’uko mutuel ikora akazi kayo.

Kuba we n’umuryango avukamo barabuze ayo kwishyura ibitaro ngo bigaragza ko nta bushobozi afite bwo kurera abana yabyaye bafite ikibazo cy’ibiro bituzuye.

Niragire yatewe inda n’umunyeshuli wiga mu mwaka wa gatandatu mu gihe we yigaga mu mwaka wa gatanu, gucikiriza amashuri akabyara bikaba bizatuma adashobora gusubira ku ishuri kuko ntawe yasigira abana uretse nyina nawe utishoboye ugomba gushaka ibitunga abandi bana barindwi.

Impanga zabyawe na Niragire Angelique.

Mu gihe cy’ukwezi Niragire Angelique yatunzwe n’ibitaro n’abagiraneza bamufashaga kubona amafunguro n’ibitunga abana be. Ubwo yarimo yitegura gusezererwa, yabwiye abanyamakuru ko yicuza icyatumye akora imibonano idakingiye, ibi bikaba bigaragarira uburyo akimara kumenya ko abyaye abakobwa 2 n’umuhungu 1yahise agwa muri koma.

Dr Ayingeneye Violette, umuganga ushinzwe gukurikirana ubuzima bw’abana mu bitaro bya Gisenyi, avuga ko abana ba Niragire barimo kugenda bagira ubuzima bwiza ugereranyije n’uko bavutse bameze, cyakora agaragaza ko ubuzima bw’aba bana bushobora guhungabana batabonye ubufasha cyane ko nyina ubabyara atishoboye.

Umurenge wa Gisenyi Niragire avukamo washoboye gukusanya amafaranga agera ku bihumbi 100 kugira ngo ashobore kwishyura ibitaro atahe, ariko azasaguka azashobora no kumufasha mu bindi mu gihe n’abandi bagiraneza bazagira icyo batanga.

Sylidio Sebuharara