Kanyamahanga Rassan ufite abana 7 amaze imyaka ine yifungishije. Avuga ko kwifungisha byamugiriye akamaro kuko atakomeje kubyara. Agira ati “ubwose iyo ntifungisha sinari kuba njyeze mu icumi? Madamu we rwose nta buryo yari agikoresha byose byaramwicaga”.

Nkurikiyingoma Jean Nepo w’imyaka 38 we avuga ko kwifungisha bitigeze bituma ananirwa gutera akabariro nk’uko bamwe babikeka, ahubwo ngo byamwongereye umunezero kuko nta mpungenge zo gutera inda aba afite.

Agira ati “Nta kibazo na kimwe nigeze mpura nacyo ku bijyanye no gutera akabariro. Gahunda irakomeza nk’ uko byari bisanzwe, ahubwo nabonye nararushijeho kugira ubuzima bwiza”.

Ushinzwe ubuzima muri Rulindo, Manirafasha Jean d’Amour, avuga ko nubwo hari amakuru atandukanye aca intege abagabo bafite gahunda yo kuboneza urubyaro ababwitabiriye basanze nta ngaruka zirimo, kandi babikangurira abandi.

Manirafasha agira ati “Kwifungisha burundu ku mugabo nta ngaruka n’imwe bigira. Hari abakeka ko ari ugukona ariko sibyo kuko ari utuyoborantanga bafunga ubundi umugabo agakomeza gukora imibonano mpuzabitsina bisanzwe ariko ntabe yatera inda”.

Uretse iryo shyirahamwe ry’abagabo biyemeje gukangurira bagenzi babo ibyiza byo kwifungisha, hari na gahunda yiswe ‘Each one invites three people’, aho umugabo wabashije kuboneza urubyaro atumira abandi batatu akababwira ibyiza byabyo bigatuma byibura umwe muri abo nawe afata icyemezo.

Muri Rulindo hari ingo zigera kuri 250 zaboneje urubyaro umugabo yifungisha burundu. Ubu buryo buhabwa umuntu ari uko we n’uwo bashakanye bose bemeye ko ubu buryo bukoreshwa kandi bakabishyiraho umukono.

Jean Noel Mugabo