Mukaniragire yageze ku kigo nderabuzima cya Gihundwe saa kumi n’ebyiri z’umugoroba kugira ngo bamufashe kubyara neza ariko ngo ntiyitaweho kuko yagejeje saa tatu z’ijoro bataramugeraho.

Umurwaza wa Mukaniragire amaze kubona ko arembye ngo yagiye kubyutsa abaforomo bamugezeho bamubwira ko ari ibisanzwe kuzana amazi menshi ku mubyeyi ugiye kubyara.

Saa kumi n’imwe ngo nibwo umuforumu yagarutse asanga urureri rwabanjirije umwana niko guhita bamwoherereza mu bitaro bikuru bya Gihundwe kuko ubushobozi bwabo bwagarukiraga aho.

Umuyobozi w’ikigo nderabuzima cya Gihundwe, Imelda Imaniraho, kimwe n’abaforumu bari baraye izamu (Uwarezweneza Collette na Jacques Muhayimana) bavuga ko uwo mubyeyi bamwitayeho nk’uko bikwiye kugeza aho urureri ruje mbere y’umwana bahita bawoherereza mu bitaro bikuru bya Gihundwe ariko ngo umwana yari akiri muzima mu nda ya nyina.

Jacques Muhayimana avuga ko habayeho gutinda kubonana n’umuganga wagombaga kumubyaza kuko ngo basanze ataraye ku izamu kugeza aho bajya kumushaka iwe mu rugo ibyo ngo akaba abona ko aribyo byatumye umwana apfira mu nda.

Dr Uzabakiriho Raphael wagombaga kurara ku izamu atangaza ko igihe umubyeyi yagereye mu bitaro ku mugoroba yahise akorerwa ibyo yagombaga ngo kuko bamuzana yari yarangije kuzana urureri mbere y’umwana kandi mu busanzwe umwana ariwe ubanza. Icyo gihe umubyeyi ngo aba ari hagati y’urupfu no gukira.

Dr Uzabakiriho yemeza ko mu minota 25 ibyo uwo mubyeyi yagombaga gukorerwa byose babimufashije uretse ko ngo umwana yahumekaga gahoro mu nda ya nyina bivuga ko yari asigaranye akuka gake naho ibyo kuvuga ngo ntiyari yaraye izamu ngo ni ukumubeshyera yari ahari.

Muri make impanze zose zitana bamwana. Ikindi kandi abaganga batangaza ngo iyo umugore yazanye urureri hagashira iminota 15 bataramufasha ashobora kwitaba Imana.

Undi mubyeyi yapfushije umwana mu buryo butunguranye

Uwizeyimana w’imyaka 20 usanzwe akora umwuga w’uburaya mu murenge wa Kamembe ari naho atuye, yasohotse hanze asiga aryamishije umwana we ku gitanda nyuma y’umwanya utari munini agarutse asanga yitabye Imana ahagana saa tatu n’igice zo kuwa 20/09/2012.

Uwizeyimana, urupfu rw’umwana we rwamubereye urujijo.

Uwizeyimana yatangaje ko umwana we nta n’ikintu yari arwaye. Ubwo yamaraga guhura n’ibyo byago yahise ahuruza abaturanyi be kugira ngo bamutabare. Niyitegeka Chantal, umuturanyi wa Uwizeyimana, avuga ko bakihagera basanze umwana yarangije kwitaba Imana afite ifuro mu mazuru.

Aba baturanyi be ariko bavuga ko nta muntu wari uzi uwo mwana neza kuko nyina atamusohoraga hanze. Bamwe bakeka ko nyina yaba yari yasize umwana agahanuka ku gitanda yagiye gukora uburaya dore ko nawe yemera ko abukora ngo kuko ariwo mwuga umubeshejeho.

Uwizeyimana we yabihakanye yivuye inyuma avuga ko yaruhafi y’urugo rwe kandi akaba atatinze hanze. Kubera urujijo rw’urupfu rw’umwana wa Uwizeyimana inzego z’umutekano zahise zijyana umurambo ku bitaro bya Gihundwe kugira ngo barebe icyo azize.

Musabwa Euphrem