Ibi kuri aya makipe bitegerejwe mu mikino yose akinira iwayo aho Manchester City ya mbere kugeza ubu iba yakiriye West Ham United. Iyi kipe isabwa gutsinda umukino wayo byonyine ikegukana igikombe yatwara ifite amanota 91. Iyo usubiye inyuma usanga amahirwe ari menshi kuri Manchester City kuko iheruka gutsindirwa mu rugo na West Ham United mu 2003 mu gihe kuhanganyiriza biheruka mu 2008.

Ubwo yari amaze gutsinda Tottenham Hotspur ibitego 2-0 mu mukino w’ikirarane wabaye ku wa 12 Gicurasi 2024, umutoza wa Manchester City, Pep Guardiola, yavuze ko babizi ko bafite akazi ko gukora kuri West Ham United.

Ati “Turabizi dufite akazi ko gukora kuri West Ham United kandi abafana bazadushyigikira birumvikana.”

Uyu mugabo yavuze ko agendeye ku bakinnnyi ba West Ham United, buri kintu cyose cyabaho.

Ati “Ubu hagezweho Mohamed Kudus, Michail Antonio, Jarrod Bowen, James Ward Prowse na Thomas Soucek, buri kimwe cyose cyaba.”

Aba ni bamwe mu bakinnyi ngenderwaho ba West Ham United.

Iyi kipe ya Manchester City kandi kuri iki Cyumweru ifite amahirwe menshi kuko mu myaka irindwi iheruka, ubwo yageraga ku munsi wa nyuma wa shampiyona iyoboye urutonde , inshuro esheshatu yaracyegukanye usibye mu 2019-2020 aho Liverpool ari yo yatwaye iyo shampiyona inageze ku munsi wa nyuma ari yo iyoboye.

Arsenal irasabwa gutsinda Everton ariko igahanga amaso ibibera kwa Manchester City

Ikipe ya Arsenal na yo ku isaha imwe ya saa kumi n’imwe iraba yakiriye mu rugo ikipe ya Everton. Ni ku nshuro ya kabiri yikurikiranya Arsenal yerekanye ko bishoboka kuba yatwara igikombe. Iraba isabwa gutsinda umukino wayo ariko byose bitari mu maboko yayo, ahubwo ikaba inacungira hafi umukino uba uri guhuza Manchester City na West Ham United. Abasesenguzi benshi ndetse n’abakunzi ba ruhago bavuga ko inzira Arsenal isabwa kunyuramo ngo itware shampiyona zigoye kuko batabona Manchester City yakora ikosa ryo gutsindirwa cyangwa kunganyiriza mu rugo.

Imibare ishoboka:

Manchester City :

Manchester City Isabwa gutsinda Westham United igatwara igikombe.

Manchester City inganyije, Arsenal igatsindwa cyangwa ikanganya nabwo Manchester City yakwegukana igikombe.

Manchester City itsinzwe, Arsenal igatsindwa cyangwa ikanganya nabwo yatwara igikombe.

Arsenal :

Arsenal itegetswe gutsinda Everton ariko ntabwo byaba bihagije kuko bisaba kureba uko umukino wa Manchester City wagenze.

Kunganya kwa Arsenal ntacyo byayifasha nubwo Manchester City yaba yatsinzwe na West Ham United kuko n’ubundi itakwegukana igikombe mu gihe gutsindwa byo byaba bibi kurushaho.

Imikino yose uko ari icumi iteganyijwe gutangira ku isaha ya saa kumi n’imwe.