Itangazo ryavuye muri Ministeri y’Ubutegetsi bw’igihugu (MINILOC) tariki 02/06/2012 rivuga riti “Ubwigenge bwabonetse mu mivu y’amaraso n’inkongi y’umuriro, ku buryo kubwita ubwigenge nyakuri (real independence) byaba ari ukwibeshya”.

Ariko ngo Abanyarwanda babirenzeho bibuka kwibohora ku itariki yibukirwaho ubwigenge, kugira ngo bisuzume aho bageze bakosora ibyaranze ingoma zabayeho nyuma y’Ubukoroni bwasize umurage mubi w’amacakubiri mu Banyarwanda.

Nk’uko insanganyamatsiko yo kwibuka ku nshuro ya 18 Jenoside yakorewe Abatutsi igira iti: “Twigire ku mateka twubaka ejo hazaza”, Abanyarwanda ngo bazazirikana imyaka mibi u Rwanda rwanyuzemo kuva ubukoroni bwatangira ahagana mu 1900 kugera mu 1962, ndetse no kuva icyo gihe kugera mu 1994.

Bimwe mu byakosowe nyuma ya 1994 harimo imyubakire y’ubumwe bw’Abanyarwanda ivugwa kuba itarigeze iranga abategetsi ba nyuma y’Ubwigenge; nk’uko MINALOC yabitangaje.

Ladislas Ndendahimana ushinzwe itangazamakuru muri MINALOC yashimangiye iri tangazo avuga ko isabukuru nk’iyi noneho itagamije ahanini kwishima, ahubwo ngo ni ukwisuzuma kuko ngo umuntu ashobora gukora isabukuru mu buryo bubiri: iy’akababaro n’iy’ibyishimo. Umunsi wo kwibohoza usanzwe wizihizwa tariki 04 Nyakanga buri mwaka.

Ubu bimwe mu bizaranga icyerekezo 2020 u Rwanda rwihaye ngo ni ukubona buri Munyarwanda ashobora kwiyinjiriza byibuze amadolari ya Amerika 1500 (amafaranga y’u Rwanda ibihumbi 900) ku mwaka.

U Rwanda rwakoronijwe n’ibihugu bibiri: Ubudage n’Ububirigi. Abo bakoroni bashinjwa kwigisha amacakubiri ashingiye ku moko bazanye: Tutsi, Hutu na Twa.

Simon Kamuzinzi