Hagamijwe kwihutisha iterambere ry’igihugu, abikorera bo muri ako karere bavuze ko bitarenze tariki ya 20 Gicurasi 2016, bazaba bamaze kugeza ayo mafaranga kuri konti y’icyo kigega aho buri wese yagiye yiyemeza umusanzu w’amafaranga azatanga.

Umuyobozi w’Urugaga rw’Abikorera (PSF) mu Karere ka Rusisi, Ngabonziza Jean Bosco, yagize ati “Twemeye ko miliyoni 20 tugiye kuzishyira mu kigega Agaciro. Twavuze ko kugeza ku wa 20 Gicurasi 2016 tuzaba twabirangije kuko iyo iterambere ryihuse natwe tuba twihuse.”

Bamwe mu bacuruzi bo muri aka karere bavuga ko bishimiye kongera gushyigikira iki gikorwa ngo basanga ari ukwihesha agaciro haba ku giti cyabo n’igihugu muri rusange, dore ko buri wese yagiye atanga umusanzu utamuvunnye hakurikijwe ubushobozi bamuziho.

Mugabushaka Joseph, umwe mu bacuruzi bakorera muri aka karere, yavuze ko gushyigikira ikigega Agaciro ni ibintu byiza kandi ko abacyitabiriye bari bishimiye gutanga uruhare rwabo mu kubaka igihugu.

Umunyamabanga Nshingwabikorwa w’Umurenge wa Kamembe, Ntivuguruzwa Gervais, avuga ko ari igikorwa ngarukamwaka cyo gushyigikira ikigega cy’Agaciro. Cyakora ngo umwaka ushize ntibyakozwe nk’uko bisanzwe kuko abikorera bo muri aka karere, biyambajwe mu bindi bikorwa byo gushyigikira gahunda za Leta.

Ati “Ni gahunda isanzwe izwi aho abantu bagira uruhare mu gushyigikira kiriya kigega cy’Agaciro nk’ikigega cy’igihugu, gusa mu bihe bishize, ntabwo hagiye habaho guhuriza hamwe uwo musanzu kuko abikorera ba Rusizi bamaze iminsi biyambazwa mu bikorwa bitandukanye.”