Ni byo byifuzo bakunze kugeza kubayobozi batandukanye basura iyo nkambi basaba ko inzu nshya bari kubakirwa zakuzuzwa vuba bakabona ubwinyagamburiro kuko ubuzima bwo kutabonana kubashakanye bubahangayikishije.

Bavuga ko abo binaniye kwihangana biyandarika imbere y’abana bikaba byatera ingeso mbi mu bana.

Baganira n’intumwa za Rubanda ubwo zabasuraga mu minsi ishize zabasabye ubuvugizi kuko ikibazo cyo kutabonana kubashakanye kibateye inkeke.

Ntahonkiriye Martin ati“Ubu abagabo twabaye nk’inkone kandi dufite abagore ntitukivugana nabo iby’imibonano mpuzabitsina,uramwifuza ugasanga hafi yanyu hari abana mbese tuba tumeze nk’aho turyamanye turi abagabo babiri”.

Avuga ko bagerageza kwihangana kugira ngo batagira imico mibi banduza abana, bakifuza ko bahabwa inzu zisumbuyeho umugore n’umugabo bakagira aho bihugika bagakora ibyabo abana batumva

Bukuru Thiomede avuga ko kwihangana abifashwamo no kuba ari umurokore ati“ Baraturondera inzu nini z’amabati turakomeza twihangane gusa ndi umuntu wihannye izo ngorane iwanjye ntiziriho, nkoresha kwihangana”.

Abagore bamwe bemeza ko bafatwa ku ngufu imbere y’abana bigatuma abo bana bagira imico mibi.

Muhongerwa Gerardine agira ati“ Reba nawe inzu zacu ni nto rwose ntahantu wakwihisha nk’umugore n’umugabo ariko hari abatihangana barwana imbere y’abana ugasanga abana baronse indero mbi”.

Depite Berthe Mujawamariya yagize ati“ Ibibazo twasanze ni ubuzima babayeho, amashitingi barimo ni hato niho babika inkwi,amasafuriya, utwambaro,n’ubwo bari kububakira inzu zisumbuye kurutaho n’ubundi inzu izaba isangiwe imiryango ibiri ariko uko biri bizaba biruseho”.

Yakomeje avuga ko ikibazo cyo kurarana muri iyo nzu n’abana basanze abana bashobora gufata imico itari myiza bitewe no kurara hamwe n’ababyeyi, avuga ko babagiriye inama yo gukomeza kurangwa no kwitwararika birinda icyatera abana kuraruka bagafashwa n’imiryango inyuranye ikorera mu nkambi.

Impunzi ziri mu nkambi ya Mahama zikabakaba ibihumbi 50 muri zo 50% ni urubyiruko n’abana bato.