Uyu mugabo w’imyaka 30 y’amavuko yabanje gutema insina 400 mu rutoki rwa muramu we Zimurinda Laurence arangije ajya mu rundi rutoki rwa muramu we witwa Uwiziyimana Goretti naho ahatema insina 200 kuri uyu wa 14 Ukuboza 2015.

Zimwe mu nsina zatemwe

Masabo Pascal umuyobozi w’agateganyo w’Umurenge wa Cyabakamyi yemeje ko ubu bugizi bwa nabi bwabayeho uwo mugabo agatemagura insina.

Aganira na Kigali Today uyu muyobozi yatangaje ko Gakwenzire Noel hari hashize iminsi mike nabwo ahuye n’umwe muri abo baramu be witwa Zimurinda akamwambura isuka ashaka kuyimutemesha ariko uwo mugambi mubi ntashobore kuwusohoza.

Yagize ati “Ni umugabo wari umaze iminsi afitanye amakimbirane n’umugore we ku buryo yabonye bikomeye akahukana”.

Uku kwararika insina za baramu be azitemaguye ngo yabitewe n’uko umugore we ari ho yari yarahukaniye amuhunga.

Yagize ati “Mu mwanya wo kubura uko yakwihimura ku mugore we cyangwa kuri baramu be yafashe urutoki rwabo ararutemagura”.

Masabo Pascal yakomeje atangaza ko nyuma y’aho uwo mugabo akoze iryo bara yahise nawe atabwa muri yombi kugira ngo atagira ikindi gikorwa kibi akora.

Usibye kuba Gakwenzire yisobanura ko mu byamuteye gutema urutoki rwa baramu be ari umujinya, umuyobozi w’Umurenge yanatangaje ko akeka ko haba harimo n’ubusinzi bw’inzoga z’inkorano zitemewe cyangwa ibindi biyobyabwenge.

Yagize ati” Ntabwo waba uri muzima utafashe ku biyobyabwenge ngo utinyuke gutema urutoki rwa baramu bawe bitewe n’uko umugore yahukanye”.

Uyu muyoboizi yaburiye abantu kwirinda ibikorwa nk’ibi abasaba ko mu gihe habonetse ikibazo cyose bakwisunga ubuyobozi bukabakemurira ikibazo ariko hatabayeho kwihorera.

Umuyobozi wa Polisi y’Igihugu mu karere ka Nyanza CIP Athanase Ruganintwari nawe yemeje ko uyu mugabo bamutaye muri yombi ariko asobanura ko ikibazo cye kizakemukira mu bunzi bitewe n’imimerere y’iki cyaha ndetse n’agaciro k’ibyo yangije.