Mu gihe usanga akenshi abamotari batungwa agatoki mu guteza umutekano muke mu muhanda, mu gusoza ukwezi kwahariwe umutekano wo mu muhanda kuri uyu wa 7 Ukwakira 2015, bagaragaje ko abagenzi bagira uruhare runini mu guteza impanuka.

Abamotari banenga abagenzi barangara bagateza impanuka kubera gukoresha nabi umuhanda.

Ignace Kamasa, umwe mu bamotari ba Nyamagabe, avuga ko hari abagenzi bakoresha nabi umuhanda ugasanga bateje impanuka maze asaba kujya na bo bubahiriza amategeko y’umuhanda kuko areba buri wese uwukoresha.

Yagize ati “Ariko abagenzi baratubangamira inshuro nyinshi ugasanga umuntu arambuka umuhanda asangiye n’ibinyabiziga ari kuri terefoni cyangwa whatsapp ukavuza ihoni mpaka umugezeho, abagenda badafashe abana babakinisha mu muhanda ugasanga urabagonze.”

Marcel Munyampundu, umwe mu baturage bo mu Karere ka Nyamagabe, yavuze ko koko nk’abagenzi nab o bagomba gufata ingamba zo kubahiriza amategeko abagenga kugira ngo batabangamira ibinyabiziga.

Yagize ati “Tugiye kujya dutangira amakuru ku gihe ku muntu udutwaye nabi, dukoreshe umuhanda neza tureba twa tumenyetso tw’umweru tutwemerera gutambuka kandi tugendere iburyo bw’umuhanda kugira ngo twirinde impanuka.”

Umyobozi w’Akarere ka Nyamagabe, Philbert Mugisha, yasabye by’umwihariko abagenzi gukunda ubuzima bwabo bubahiriza amategeko y’umuhanda.

Yagize ati “Turasaba umuntu kugenda mu muhanda ntiyumve ko ari we wenyine urimo uwukoresha, ntihabemo kwirara. Nk’abagendera hagati mu muhanda ngo imodoka niza baravamo kuko ari bo usanga bateje impanuka, tubasaba kugira amakenga mu muhanda.”

Mu mezi atatu ashize, mu Karere ka Nyamagabe, abagera kuri 3 bapfuye bazize impanuka naho abagera kuri 4 bakomereka bikabije.

Caissy Christine Nakure