Uyu muyobozi w’itsinda rya “Gagamel Crew” aherutse kubitangariza KT Radio, Radio ya Kigali Today, ubwo yari abajijwe mu kiganiro niba hari umuhanzi w’Umunyarwanda yumva bakorana na we indirimbo.

Bebe Cool ari kumwe n’umunyamakuru w’imyadagaduro ya Kigali Today, Andrew Shyaka.

Bebe Cool yagize ati “Mu cyumba cyanjye muri Hotel nahoze ndeba televiziyo mbona umusore Bruce Melody, afite ahazaza heza muri muzika niba azi icyo ashaka.”

Uyu muhanzi uzwiho amisatsi iboshye bita “dreads” yagiriye inama Bruce Melody yo kugira impano ari kimwe guhirwa bikaba ikindi maze amusaba gukunda ibyo akora, kwihangana no kugira ikinyabupfura kugira ngo azabigereho.

Yasabye kandi abahanzi b’Abanyarwanda kugira umwihariko bagahanga udushya kugira ngo bigaragaze mu ruhando mpuzamahanga.

Bebe Cool asanga Bruce Melody akunze ibyo akora, akarangwa no kwiyubaha no kwihangana yazagera kure mu muziki.

Umuhanzi Bruce Melody yamaze gukorana indirimbo n’abahanzi batandukanye bo muri aka karere barimo Radio Mwozey, Jamala kandi ni n’umwe mu bahanzi, mu Rwanda, bashimisha abafana cyane mu kuririmba imbona nkubone (live).

Twabibutsa ko Bebe Cool muri Kigali mu mpera z’icyumweru gice mu gitaramo cyari cyiswe Rwanda International Fashion World show cyabereye muri Hotel Porto Fino aho yanashimishije cyane abari bakitabiriye.

Andrew Shyaka