Bene izo mpinja ngo ziba zavutse zifite amagarama 600 zigashyirwa mu byuma byabugenewe ziherwamo umwuka wa Oxygen zigakomeza kwitabwaho n’abaganga kugeza zikuze, nk’uko umuyobozi w’ibyo bitaro Dr. Fulgence Nkikabahizi abivuga.

Ikibazo cy’umwuka wa Oxygen muri ibyo bitaro ngo cyari ingorabahizi mbere y’uko bibona urwo ruganda ruwukora, kuko ibitaro byajyaga kuwugura mu bindi bitaro bikomeye i Kigali.

Hari igihe umwuka byaguraga wabaga udahagije bitewe n’ubwinshi bw’ababaga bawukeneye, bikaba ngombwa kuwusaranganya abawukeneye bose. Ibi ngo byatezaga ikibazo cyane cyane ku bana b’impinja babaga bagomba gukurikiranwa ku buryo bw’umwihariko.

Mu rwego rw’ubuzima u Rwanda kimwe n’ibindi bihugu byari bimaze igihe biharanira kugera kuri imwe mu ntego z’ikinyagihumbi yo kugabanya impfu z’abana baterengeje imyaka itanu, igice kinini by’umwihariko impinja zitarengeje iminsi 28.

Iyi ntego u Rwanda rwamaze kuyigeraho nk’uko umuyobozi w’ibitaro bya Rwinkwavu abivuga. By’umwihariko muri ibyo bitaro ngo ntibikunze kubaho ko hagira uruhinja ruhaburira ubuzima nyuma y’uko ibitaro bibonye urwo ruganda rukora umwuka wa Oxygen.

Ibitaro bya Rwinkwavu ngo byajyaga gushaka umwuka wa Oxygen i Kigali inshuro eshatu mu cyumweru.

Gutwara uwo mwuka ubwabyo ngo byashoboraga guteza impanuka kuko watwarwaga mu modoka zitabigenewe, kuri ibyo hakaniyongeraho ikibazo cy’uko umwuka ibitaro byabashaga gutwara kenshi wasangaga udahagije bitewe n’ubwinshi bw’abawukeneye.

Iyo mashini ngo yaguzwe amafaranga y’u Rwanda asaga miriyoni 60, ikaba yaraguzwe ku bufatanye bw’umushinga wa Partners in Health, umwe mu bafatanyabikorwa bakomeye b’ibitaro bya Rwinkwavu.

Umuyobozi w’ibyo bitaro avuga ko bari kuvugana n’ibitaro bya Gahini n’ibya Kibungo ku buryo na byo byazajya bifata uwo mwuka hafi bitagombye kujya kuwushaka i Kigali.

Cyprien M. Ngendahimana