Perezida Kagame avuga ko azakomeza gushyira amafaranga mu kubaka ubumenyi bw’abana n’Abanyarwanda kuko we abibonamo inyungu aho kuba igihombo kuko n’iyo batagaruka mu gihugu hari impano baba barakuye mu Rwanda ishobora gukomeza kubafasha.

Umukuru w’Igihugu yemeranya n’abavuga ko abanyagihugu bagombye kujya baza bashora imari mu gihugu imbere, cyane ko inkunga baba barayikuye ku Rwanda, ariko akavuga ko atemeranya n’abavuga ko kwishyurira abajya kwiga hanze ari umushinga utunguka.

Kagame agira ati “Twarihiye abanyeshuri babarirwa mu 100 ariko ugasanga hari abavuga ngo ntacyo bimaze kuko batazagaruka mu Rwanda, ariko njye si ko mbibona nzakomeza gushora muri aba bana bajye kwiga kuko bifite akamaro”.

Bamwe mu banyeshuri biga hanze n’urubyiruko ruba hanze nabo bemera ko atari byiza kuba umunyarwanda ibikorwa byawe bikaguma hanze bakavuga ko bafite inzozi nyinshi bashaka kuzashyira mu bikorwa bagarutse iwabo kuko hari byinshi babona bigikenewe gushyirwamo imbaraga.

Bimwe mu byo bari kugaragariza umukuru w’igihugu biteguye guteramo inkunga hari ugufasha abatishoboye, gutsura umubano n’abari mu bindi bihugu kugirango bubake imbaraga z’ejo hazaza no guhanga imirimo mishya ku banyarwanda.

Umukuru w’igihugu avuga ko u Rwanda rwashyizeho ibikorwaremezo bitandukanye bizafasha urubyiruko, kandi ko kubaka ubushobozi ari nko kubaka umuhanda wa gari ya moshi kuko bisaba ibikoresho byinshi kugirango bene uyu muhanda uzarambe.

Kagame akavuga ko ari byo agereranya no kubaka ibikorwa remezo by’urubyiruko kuko bitakuzuriraho n’ubwo hari benshi babifitiye inyota.

Ephrem Murindabigwi