Hari mbere y’uko bashyingura imibiri 14 y’abazize Jenoside yabonetse muri iyi minsi. Muri yo, 10 yabonetse mu Murenge wa Karama, ariko umwe wonyine ni wo babashije kumenya nyirawo.

Janvier Karangwa yashimishijwe n’uko yabashije gushyingura mu cyubahiro papa we ari na we muntu wa mbere wo mu muryango we mu bazize Jenoside ashoboye gushyingura.

Indi ine ni iy’abaguye mu Karere ka Nyaruguru, ikaba yarazanywe mu Rwibutso rw’i Karama, ahashyinguye bene wabo na bo bazize Jenoside yakorewe Abatutsi mu 1994.

Jean Pierre Nsabimana ukuriye Ibuka mu Karere ka Huye, nyuma yo gushimira Ubuyobozi bw’Akarere ka Huye kuba bwarashyize imbaraga mu kubaka inzibutso za Jenoside, yagize ati “Ariko noneho kuba inzibutso zihari, zinubatse neza, nta kintu byaba bimaze cyane kuko twe tuzi ko abacu babuze n’ubundi tutarabashyingura bose.”

Yakomese asaba ababa bazi aho abazize Jenoside bajugunywe kuharanga kugira ngo bashyingurwe mu cyubahiro kuko ngo byaba bitajyanye kuba hari inzibutso nyamara abakazishyinguwemo bibereye mu misarane, mu mirima,mu miringoti n’ahandi.

Mu buhamya bwe, Claudette Uwimana wari ufite imyaka 6 mu gihe cya Jenoside, na we yasabye ko abazi aho imibiri y’ababo yajugunywe bahabarangira.

Yagize ati “Agatobwe gafite abantu benshi, abari hariya mu migende, sinjya nizera ko bose bashyinguwe. Niba uzi n’ahantu umuntu ari, ufite ubwoba bwo kubivuga, uhashyire ikimenyetso, abantu bagende bahamukure, ashyingurwe mu cyubahiro.”

Janvier Karangwa na we wari ufite imyaka 6 mu gihe cya Jenoside, we yashimishijwe n’uko ku nshuro ya mbere yabashije gushyingura mu cyubahiro umuntu wo mu muryango we.

Uwo ni se umubyara, ari na wo mubiri wabonetse i Karama babashije kumenya nyira wo. Afite icyizere kandi ko n’abo batarabona bazashyira bakababona.

Cumi na bane bashyinguwe i Karama baje basanga abandi basaga ibihumbi 70 bari bashyinguwe mu Rwibutso rwa Jenoside rwa Karama.

Marie Claire Joyeuse