KT TV
Gikundiro Forever yasezeye kuri Abuba na Makenzi ibagenera impano
Abakunzi b’ikipe ya Rayon Sports bahuriye muri Fan Club ya Gikundiro Forever, kuri uyu wa kane basezeye abari abakinnyi babo Sibomana Abuba na Nizigiyimana Karim barangije kwerekeza mu ikpe ya Gor Mahia yo muri Kenya.
Uyu ni umuhango wabereye i Remera mu ijoro ryo ku wa kane tariki 29/1.2015, aho aba bakunzi ba Rayon Sports basanze aba bakinnyi batagenda gutyo kuko hari byinshi bakoreye iyi kipe mbere yo kuyivamo.
Gikundiro Forever nk’imwe mu ma Fan club ya Rayon Sports amaze iminsi agaragaza ibikorwa bifatika, yaje gutumira aba bakinnyi bombi kuri Aviva mu Giporoso, niko gusangira na bo inabifuriza amahirwe masa mu buzima bushya batangiye.
Mu ijambo rye, Perezida wa Gikundiro Forever Muhire Jean Paul, yasabye Abuba na Makenzi kuzakomeza kwitwara neza nkuko babikoraga muri Rayon Sports, maze bagahesha ishema ikipe bavuyemo ari nako aboneraho gushimira aba bakinnyi ku byiza byose bakoreye ikipe yabo.
Ku giti cyabo, aba bakinnyi nabo bashimiye iyi Fan Club, ndetse banatangaza ko Rayon Sports izabahora ku mutima. Nizigiyimana Karim Makenzi ngo aracyanizeye kuzagaruka i Nyanza.
“ Nkunda Rayon Sports,narayitangiye igihe kinini kandi ndacyizeye kuzayigarukamo”.
“Hari ubwo nigeze gukina ndwaye ikibyimba ku itako nteye tackle kirameneka. Urukundo nkunda Rayon ntiruzashira cyane ko mu buzima ushobora kujya guhahira ahandi ariko ukagaruka mu rugo.”
Ku rundi ruhande, Sibomana Abuba we yavuze ko mu myaka itandatu yakiniye Rayon byari urukundo n’ubwitange ndengakamere. Uyu yatangaje ko azakomeza kuyihoza ku mutima aho azaba ari muri Kenya, maze yifuriza umugisha Rayon Sports n’abakunzi bayo ndetse anabwira Gikundiro Forever kuzakomeza kugaragariza urukundo abakinnyi kuko hari icyo bibongereraho.
Abuba na Makenzi bagiye muri Gor Mahia mu ntangiriro z’uku kwa mbere bahawe ibihumbi 18,500 by’amadolari buri muntu hanyuma buri wese agaha Rayon Sports ibihumbi bine. Bombi bagiye kujya bahembwa umushahara ungana n’amadolari 1,700 ($1,700) ku kwezi.
Aba basore, bari mu bagize uruhare runini mu gufasha Rayon Sports gutwara igikombe cya shampiyona cya 2013 ndetse bakaba barinze bava muri iyi kipe y’i Nyanza babarirwa mu nkingi za mwamba zayo, aho impande zabo zagoraga cyane amakipe bahanganye.
Nubwo abafana b’iyi kipe bashimiye aba basore, umwe mu bayobozi ba Rayon Sports akaba we yarabagereranyije nk’amatungo yari amaze kunanira bityo nyirayo agahitamo kuyagurisha ngo atagumura ayandi.
Gikundiro Fan Club igizwe n’abafana 68 bahurizwa hamwe no gukunda ikipe ya Rayon Sports. Uretse guherekeza ikipe ya Rayon Sports aho igiye hose aba bafana bakaba bajya bagurira ikipe yabo bimwe mu bikoresho harimo n’imitobe(Juices) yo kunywa nyuma yo gukina. Aba bakaba baragize uruhare runini mu gutegura ubukwe bw’umunyezamu Bikorimana Gerrard ndetse bakaba baranasuye abakinnyi i Nyanza babagenera ubunani.
Jah d’eau DUKUZE
Ibitekerezo ( 1 )
Ohereza igitekerezo
|
|
Iki gikorwa ni inyamibwa kabisa,twese hamwe dukwiriye kujya tumenya gushima ibyo tuba twarakorewe,ubundi tukabifuriza umugisha utagabanyije aho bagiye.