Kuri uyu wa gatandatu tarki 24/1/2015, nyuma y’imyaka igera hafi kuri itatu Diyosezi ya Gikongoro yo mu karere ka Nyamagabe yari imaze nta umwepisikopi ifite, yabonye umwepisikopi mushya, Celestin Hakizimana wahawe ubwepisikopi ku mugaragaro mu gitambo cya misa.

Musenyeri Celestin Hakizimana nyuma yo guhabwa ubwepisikopi ku mugaragaro yicajwe mu ntebe y’ubushumba.

Musenyeri Celestin Hakizimana asimbuye ku ntebe y’ubushumba musenyeri Augustin Misago witabye Imana taliki 12/3/2012, nyuma y’uko yari asanzwe ari umunyamabanga mukuru w’inama y’Abepisikopi mu Rwanda.

Musenyeri Celestin Hakizimana wahawe ubwepisikopi akagirwa umushumba wa Diyosezi ya Gikongoro yatangaje ko intego ye ari ukuzafasha abakirisitu ndetse n’abapadiri yahawe kuyobora, kurushaho kuyoboka Imana bagendera mu nzira.

Nyuma yo ghabwa ubwepisikopi Musenyeli Celestin hakizimana yarambitsweho ibiganza n’abasenyeri bagenzi be bo mu ma diyosezi atandukanye ndetse n’abaturutse mu bihugu by’abaturanyi nk’u Burundi.

Nyuma yo guhyikirizwa inkoni y’ubushumba yagize ati “Ubutumwa mpa abakirisitu bose bo ku Gikongoro, abapadiri, ndetse n’abandi bari ku isi hose ni ukugana Imana, tukava aho turi ntitube indorerezi tukaba abakirisitu nyabo bazi icyo bakora, kugira ngo dufatanyarizi hamwe, tuzane rubanda nyamwinshi ku Mana.”

Imvura nyinshi ivanze n’umuyaga yaguye mu isozwa ry’igitambo cya misa yafashwe nk’umugisha wahawe abanyagikongoro ndetse n’abitabiriye ibi birori mu rusange byari byitabiriwe n’imbaga nyamwinshi y’abakirisitu bo mu karere ka Nyamagabe n’abandi baturutse hirya no hino mu gihugu.

Musenyeri Celestin Hakizima akorerwaho imihango yo guhabwa ubwepisikopi.

Ibi birori bikaba byari byitabiriwe n’abayobozi bo ku rwego rw’igihugu, peresida wa sena Bernard Makuza, minisitiri w’ubutegetsi bw’igihugu Francis Kaboneka, guverineri w’intara y’amajyepho Alphonse Munyentwali, abayobozi b’akarere ka Nyamagabe, abo mu nzego z’umutekano, abihayimana ndetse n’abahagarariye amadini n’amatorero.

Andi mafoto:

abayobozi bo ku rwego rw’igihugu mu nzego zitandukanye nabo bari bitabiriye ibi birori.

Abihayimana batandukanye bari bitabiriye ibirori.

Imbaga nyamwinshi y’abakiristu yari yitabiriye ibirori.

Caissy Christine Nakure