Mu gihe cya saa sita z’amanywa, ubwo umunyamakuru wa Kigali today yari ageze ku biro by’aka kagari, yasanze nta muyobozi n’umwe uhari, ariko bamwe mu baturage bamutangariza uko babibonye.

Ereda Mukabagwiza, ati “njye mvuye guhinga nsanga bafashe amazirantoki bayanyanyagije hano mu mirima yacu, mbajije abana barambwira ngo ku kagari baraye bahitumye, abakuru b’imidugudu nibo baje kuyayora bayata hano”.

N’ubwo bagerageje gukuraho amazirantoki hamwe na hamwe yari agihari.

Undi nawe ati “dore hano ku ngufuri byari bihuzuye, yafashe ikintu cy’ikigori aragifata akajya akiyoza amazirantoki akayasiga ku rugi, ku mafoto y’abayobozi ndetse no ku ngufuri”.

Kigali today yashatse kumenya icyo ubuyobozi bw’akagari buvuga kuri iki kibazo, maze ku murongo wa Telefone igendanwa ivugana n’umunyamabanga nshingwabikorwa w’aka Kagari ka Kebero, Mujawimana Anathalie, avuga ko ataboneka kuko ari mu nama, naho umunyambanga nshingwabikorwa w’Umurenge wa Ntongwe, Ngendahayo Bertin asubiza ko iby’iki kibazo atabizi.

Gusa abaturage bari ku biro by’aka kagari bavuga ko ubuyobozi bwashinjaga abakuru b’imidugudu kuba inyuma y’iki gikorwa kuko nta marondo yari yarawe.

Abaturage baje bahinguye abenshi nibwo babimenye.

Umwe yagite ati “gitifu w’akagari kacu ahageze yategetse abakuru b’imidugudu kuyakuraho bakazana n’amazi bakahoza, kuko ngo bari banze gupanga irondo bitewe n’uko babwiwe n’uwitwa Claude ko bagomba kwitahira we ari buhararire akagari kakazajya kwamwishyura, nyine twumvaga basubiranamo cyane”.

N’ubwo bari bagerageje gusukura ahashyizwe uyu mwanda wabonaga ku bikuta bimwe na bimwe ugihari.

Eric Muvara