KT TV
Kurihira abana amashuri; bimwe mu bigwi ingabo z’u Rwanda zisize i Darfour
Ingabo z’u Rwanda zivuye mu butumwa bwo kubungabunga amahoro mu ntara ya Darfour muri Sudan zirashimwa ibikorwa byiza zisizeyo birimo kurihira abana amashuri, guhuza impande zombi zishyamiranye n’ibikorwa by’umuganda byose byiyongera ku nshingano nyamukuru yazijyanye yo kirinda umutekano.
Ibi byose byatumaga izi ngabo ari abaturage ndetse n’inyeshyamba zirwana babiyumvamo ku buryo gutaha kwabo byari agahinda ku basigaye, nk’uko byatangajwe na Col. Sam Baguma, wari uyoboye icyiciro cya nyuma cy’izi ngabo zageze i Kigali ku mugoroba wo ku wa kane tariki 27/11/2014.
Yagize ati “Twafashije ibigo by’amashuri twebwe ubwacu twikora ku mufuka duteranya dutangirira amafaranga y’ishuri abanyeshuri bagera ku 160 ndetse tubarihira amafaranga y’ibizamini. Twagerageje no gutanga amakaye n’ingwa kugira ngo babashe kwigisha abo bana babaga batandukanye”.
Ibyo ni bimwe mu bikorwa birimo n’umuganda rusange wa buri kwezi bongeraga ku nshingano zabo za buri munsi zo kurinda no kubungabunga amahoro mu ntara ya Darfour, ku buryo Abanyasudani bishimiye cyane icyo gikorwa bakajya bahora babandikira babashimira.
Ikindi cyabashimishije ni uko ngo begeraga abarwanyi nabo bakabaganiriza bakanamenya ibibazo byabo, ku buryo wasangaga ari uruhande rwa leta n’uruhande rw’abarwanyi nta kibazo babaga bafite, nk’uko Col. Baguma akomeza abivuga.
Iki nicyo kiciro cya nyuma cyari kigize batayo eshatu zari zimaze umwaka muri Darfour, kikaba cyaratangiye kuza gisimburana n’izindi batayo eshatu zari zigiye mu butumwa, muri gahunda yatangiye guhera tariki 6/11/2014.
Brig. Gen. Nzabamwita, umuvugizi w’ingabo z’u Rwanda, yatangaje ko bishimiye kwakira aba basirikare, kuko ubutumwa bakoze bwari mu izina ry’igihugu kandi bakaba barahesheje ishema u Rwanda.
Aba basirikare batashye bahawe icyumweru cyo kuruhuka no gusabana n’imiryango yabo mbere y’uko basubira mu kazi, ariko banasabwa gukomeza kurangwa n’ikinyabupfura.
Gahunda yo gusimburanya ingabo ziri mu butumwa bw’amahoro izongera gusubukura mu kwezi kwa 2/2015, aho abasirikare bari muri Repubulika ya Centre Afrique bazaba batashye basimburwa n’abandi.
Emmanuel N. Hitimana
Ibitekerezo ( 6 )
Ohereza igitekerezo
|
|
Ibikorwa by’ingabo z’u rwanda mu butumwa bwo kubungabunga amahoro ni intagereranwa,byagakwiye kubera urugero ibindi bihugu bifite ingabo muri ubu butumwa kuko bishimangira amahoro kurusha ibikorwa bya gisirikare akenshi byibandwaho
Kubungabunga amahoro si uguhosha invururu gusa,bikwiye no guherekezwa n’ibikorwa nk’ibi kuko bituma amahoro ashimangirwa ku buryo burambye.
ingabo zacu zitwara neza ku kazi kazo bigatuma bose bazikunda, turanazisaba ko zakomerezaho aho zigarutse hano iwacu kuko hari ibindi bizitegereje
ikinyabupfura ingabo zacu zigaragaza hanze mu kazi kazo ki byo bituma zikundwa , turabashimira akazi bakoze tunabasba gukomeza gukunda igihugu kuko akazi karakomeje
ikinyabupfura ingabo zacu zigaragaza hanze mu kazi kazo ki byo bituma zikundwa , turabashimira akazi bakoze tunabasba gukomeza gukunda igihugu kuko akazi karakomeje
ikinyabupfura ingabo zacu zigaragaza hanze mu kazi kazo ki byo bituma zikundwa , turabashimira akazi bakoze tunabasba gukomeza gukunda igihugu kuko akazi karakomeje