Mu mezi abiri ashize, mu karere ka Ngororero abagabo babiri bariyahuye aho basanzwe bashizemo umwuka bityo ntihamenyekane impamvu y’uko kwiyahura. Uretse aba kandi, polisi inavuga ko no mu bihe byashize, abagabo aribo benshi mu biyahuye cyangwa ababigerageje ntibabigereho.

Umukozi w’akarere ushinzwe imiyoborere myiza, Ndayambaje Garoi avuga ko uko kwiyahura bishobora kuba biterwa no gukoresha ibiyobyabwenge n’ubusinzi bituma abagabo biyahura bazi ko bahima abagore babo, igihe bagiranye ibibazo bihariye mu miryango yabo.

Abagabo ngo nibo biyahura kenshi kurusha abagore.

Ikindi kivugwa gitera abagabo kwiyahura ngo ni uguhubuka mu gukora ibyaha bikomeye nyuma batekereza ko bazafatwa bagacibwa imanza bagahitamo kwiyahura, ndetse ngo hari n’ababigerageje bikabananira nk’umugabo witwa Nkubana Vincent wo mu murenge wa Muhororo uherutse kubigerageza amaze kwica umugore we ariko umugambi we ugapfuba, ubu akaba yarakatiwe igifungo cya burundu.

Abagabo bakwiye kwegerwa by’umwihariko

Umuyobozi w’akarere ka Ngororero, Ruboneza Gédéon asanga abagabo bazwiho kugira imyitwarire mibi mu ngo bakwiye kwegerwa bakigishwa hakiri kare kugira ngo kwiyahura bicike burundu.

Muri aka karere hatangijwe gahunda zitandukanye zihuza abaturage nk’umugoroba w’ababyeyi, gahunda yo kubyarana muri batisimu n’ibindi ariko abazwiho imyitwarire mibi bakaba badakunze kwitabira.

Gusa umuyobozi w’akarere avuga ko bene abo bagiye kujya bajyanwa mu kigo ngororamuco cy’akarere maze bakabanza kwigishwa indangagaciro nyarwanda no kwiyubaha, abagaragaje kwisubiraho bagasubizwa mu miryango yabo.

Ernest Kalinganire