Gratien Habimana w’imyaka 29 utuye mu murenge wa Kicukiro akarere ka Kicukiro yafashwe kuri uyu wa 01/10/2014 ageze Cyunuzi yerekeza i Kigari yifashe nk’umugenzi nk’abandi ntawe ubona ko yiziritseho ibyo biyobyabwenge.

Gratien Habimana aravuga ko amaze amezi abiri muri ubwo bucuruzi kandi ko ntacyo bwamugejejeho anakangurira ababikora kubivamo ati “bamfatanye itabi ry’urumogi amabore 700 nari nayambariyeho nziko nshitse Polisi birangiye, rwose ubu bucuruzi ni igihombo gusa, mbumazemo amezi abiri mu by’ukuri ntacyo uyu mwuga wangejejeho ni igihombo gusa n’uwashaka kubijyamo yabireke birakabije izi Leta zimeze nabi nta gucuruza urumogi”.

Gratien Habimana yafashwe yihambiriyeho urumogi arugemuye i Kigali.

Umuyobozi wa police mu karere ka Kirehe Supt Augustin Rurangirwa arashishikariza abaturage kurushaho gutanga amakuru ku gihe batungira agatoki abashinzwe umutekano kuwaba acuruza ibiyobyabwenge wese.

Yihanangirije buri wese ukora ubwo bucuruzi kubivamo kuko bigira ingaruka nyinshi ku babikora, mu miryango yabo no ku gihugu muri rusange. Yavuze ko Police y’igihugu iri maso mu kurwanya abo bagizi ba nabi.

Ingingo ya 544 yo mu gitabo cy’amategeko ahana y’u Rwanda ivuga ko umuntu wese winjiza cyangwa ugurisha mu gihugu ibiyobyabwenge n’urusobe rw’imiti ikoreshwa nkabyo mu buryo bunyuranyije n’amategeko, ahanishwa igifungo kuva ku myaka itatu kugera ku myaka Itanu n’ihazabu y’amafaranga kuva ku bihumbi 500 kugeza kuri milioni eshanu.

Akarere ka Kirehe gakunze kurangwamo ibiyobyabwenge byinshi kuko gakora ku mipaka y’ibihugu bibiri Uburundi na Tanzaniya bityo bikinjira mu karere cyane cyane biturutse mu gihugu cy’abaturanyi cya Tanzaniya.

Servilien Mutuyimana