Umuryango One Family Health waje gukorera mu Rwanda ufite gahunda yo gufatanya na Leta mu kongera umubare w’amavuriro hirya no hino mu gihugu, agomba kunganira ibigo by’ubuzima muri buri murenge.

Uyu muryango wumvikanaga n’umuganga agashinga ivuriro noneho Leta ikamufasha kwishyura inzu yakodesheje, uwo muryango nawo ukamuha imiti ariko agomba kwishyura nyuma yo kwishyurwa n’ubwisungane mu buvuzi buzwi nka mituweli.

Gusa kuri ubu amavuriro abiri (yitwa One Family Health Centers) yo mu karere ka Gasabo (irya Kimihurura n’irya Rutunga) ntagikora n’andi nayo arasa n’ayenda gufunga imiryango, ba nyirayo bakavuga ko kuva batangira gukora amafaranga ya mitiweli bavurira ku baturage atabagarukira ngo bakomeze ibikorwa byabo.

Ubwo Kigali Today yageraga kuri rimwe mu mavuriro riherereye mu murenge wa Kimihurura mu karere ka Gasabo, yasanze rifunze ndetse hariho n’itangazo ryihanganisha abaturage ribasobanurira ko rizongera gufungurwa ari uko ibibazo ryagize byakemutse.

Iri vuriro rikorana n’umuryango One Family Health mu murenge wa Kimihurura ubu ryarafunze.

Bamwe mu baturage bari baje kwivuza bagaragaje ko batishimiye ko iri vuriro ryafunga, kuko ryari risanzwe riborohereza mu kazi kabo ndetse bakaba banakoreshaga amakarita ya mitiweli bakishyura macye, nk’uko byatangajwe n’uwitwa Betty Mukamana.

Yagize ati “Ni igihombo gikomeye kuri twe abaturage kuko nk’ubu nari nje kwivuza nzanye mituweli ikindi hari na hafi y’iwacu, ariko nsanze ngo bamaze iminsi badakora. Ubu ngiye kwivuriza ku rindi vuriro ryigenga baraza kunca amafaranga menshi ariko nta kundi ni ubuzima bwanjye ndengera.”

Chantal Umulisa, ny’iri vuriro, yatangaje ko iki kibazo kimaze igihe kinini, aho abakozi ba One Family Health bajya baza kubabwira ko batarishyurwa na Minisiteri y’Ubuzima. Avuga ko bamubereyemo ibiraranye bigera kuri miliyoni esheshatu z’amafaranga y’u Rwanda.

Ati “Twarabonanye banyereka n’ibipapuro bivuga ko batigeze bishyurwa bambwira ko ngo kuva batangira ngo bishyuwe ibihumbi 160, ku buryo wumva bidasobanutse. Narababwiye nti niba ari bizinesi murumva yakomeza ite?!”

Umulisa yakomeje avuga ko afite amakuru azi neza yabwiwe n’umwe mu bakozi b’uyu mushinga ko MINISANTE yamaze kubishyura, ariko akongera ko atazi impamvu neza yatumye batishyurwa.

Ku murongo wa telefoni, Maggie Cirwa umuyobozi wa One Family Health mu Rwanda yabyamaganiye kure avuga ko nta kibazo kiri mu mavuriro bakorana nayo, ariko ntiyemeza cyangwa ngo ahakane niba barakiriye amafaranga ya mitiweli bagombaga kohereza ku mavuriro.

Yagize ati “Ni ikibazo gikomeye kandi kireba impande zombi kandi natwe kiraduhangayikishije ariko nta kintu nakivugaho kugeza ubu. Muri iki cyumweru cyose turaba turi mu biganiro n’inzego kireba zose nyuma nibwo nzagira icyo ntangaza.”

Itangazo ubuyobozi bw’ivururo bwandikiye abaturage babamenyesha ko babaye bafunze.

Ubuyobozi bw’akarere ka Gasabo aya mavuriro akoreramo kandi bukaba ari bwo bushinzwe gukura amafaranga muri MINISANTE bukayohereza ku ma konti ya One Family Health, buvuga ko nta kirarane na kimwe babereyemo uyu muryango, nk’uko Joy Kemirembe, umuyobozi wa mitiweli mu karere abitangaza.

Avuga ko amafaranga yose bamaze kuyohereza ndetse akongeraho ko batari bazi ko hari ikibazo cyaba cyarabayeho kugeza ubwo amavuriro atarishyurwa. Yatangaje ko bafatanyije n’ubuyobozi bw’uyu muryango bazasura amavuriro yose bagakurikiraba ibibazo uko bimeze.

Ubusanzwe amafaranga ya mitiweli abaturage baba bishyuye ku mirenge ntahita ajya ku makonti yabo, kuko abanza kunyura mu karere ayo mavuriro abarizwamo avuye kuri MINISANTE akarere kakayohereza kuri One Family Health nayo ikaba igomba gukuraho ikiguzi cy’imiti iba yahaye ayo mavuriro asigaye ikayabaha nk’inyungu.

Umwaka ushize hari ikindi kibazo cyari cyagaragaye aho aba baganga binubaga bavuga ko MINISANTE itishyura uyu muryango wahoze witwa Health Tower Holding ariko ikaza gucyemura icyo kibazo cy’ubukerererwe mu kwishyura.

Emmanuel N. Hitimana