Abaturage batangaje ko bishimiye iki iki kiraro gihanitse mu kirere, ubwo cyatahagwa ku mugaragaro kuri iki cyumweru tariki 21/09/2014.

Cyprien Hitamungu ni umwe mu baturage benshi bari baje gutaha iki kiraro bavuga ko kije gikenewe. Yatangaje ko uretse kurengera ubuzima bw’abacaga kuri iki kiraro, bigiye no kongera ubuhahirane hagati y’abaturage byongere iterambere kuri bo.

Yagize ati “Bituzaniye iterambere iwacu kuri Sha kubera abayobozi beza dufite. Akagera kuzuraga tukabura aho duhita, ibiraro byose byari byaragiye imvura uko iguye mu gihe cy’itumba byaragendaga hanyuma badushakira abatwubakira iki kiraro. Ubu ugeze iwacu kuri Sha wakumirwa Nduba ni iya mbere.”

Iki kiraro kinyura hejuru y’umugezi wa Nyabugogo,gifite uburebure bwa metro 52.

Godfrey Karamuzi, umunyamabanga nshingwabikorwa w’umurenge wa Nduba, yavuze ko hari gahunda yo gukomeza gushaka ahandi hashobora kuba hatameze neza naho hagashyirwa ibiraro, cyane cyane ko bemerewe inkunga kandi n’abaturage bakabigiramo uruhare.

Ati “Hari ikindi kiraro nacyo kiri muri kilometero igihumbi uvuye hano nacyo gihuza akagali ka Gasura n’umurenge wa Ntarabana hafi y’Akajevuba kandi habayo ikigo nderabuzima gishobora kuzafasha abaturage bacu, abajya za Gicumbi.
Abajya za Rulindo aho naho tumaze kucyerekana kandi abaturage twamaze kuvugana nabo baratubwira ko baza kugira uruhare rukomeye kugira ngo bunganire ubuyobozi bw’umurenge.”

Iyi nzira yari ihangayikishije kuko mu mwaka wa 2012 haguyemo abantu 17 naho mu 2013 hagwamo abagera ku munani.

Iki kiraro cyahesheje uyu murenge wa Nduba umwanya wa mbere mu karere ka Gasabo mu kwesa imihigo ya 2013/2014, gifite uburebure bwa metero 52, kikaba cyaruzuye gitwaye miliyoni zisaga 20 z’amafaranga y’u Rwanda harimo n’uruhare rw’abaturage.

Iki kiraro gihuza akarere ka Gasabo k’umujyi wa Kigali binyuze mu murenge wa Nduba n’intara y’Amajyaruguru mu karere ka Rulindo binyuze mu murenge wa Ntarabana.

Emmanuel N. Hitimana