Iyi gahunda ikaba ije yunganira politiki y’igihugu yo kongera ubumenyi n’ubumenyingiro urubyiruko mu bintu bitandukanye, aho leta inashyigikira ibigo bifite iyo gahunda, nk’uko umuyobozi wa Victory Technolobies, Guy Aime Bizimana yabitangaje muri uyu muhango.

Abagera kuri 33 nibo basoje mu masomo atandukanye bari bamaze amezi atatu bigamo.

Yagize ati “Ni muri iyo gahunda igihugu cyateyemo inkunga iki kigo cya Victory Technology mu kwigisha urubyiruko ibijyanye na Graphic Design (Multi Media Courses), Video Editing, na Architectural Design (ArchiCadnaAutoCad), na Oracle Database Administration.

“Bikaba bifitiye akamaro kanini igihugu muri rusange cyane cyane ku bijyanye na Database aho usanga hari abanyamahanga babikora kandi hari Abanyarwanda babishoboye.”

Abanyeshuri bahabwa impamyabumenyi.

Bonaventure Nkiranuye umwe mu banyeshuri barangirije mu ishuri rya Victory Technology, yavuze ko amasomo ahawe azamufasha guhangana ku isoko ry’umurimo atiriwe ajya hanze, kuko ariho yari asanzwe aboneka.

Ati ”Aya masomo amfitiye akamaro ndetse n’igihugu muri rusange kuko usanga porogaramu z’aya masomo adakunda kuboneka hano mu Rwanda n’ibigo biyigisha ntago ari byinshi. Twigiye gukora umurimo ufite ireme kuko nari nsanzwe niga Civil Engineering mu ishurirya IPRC/Kicukiro.”

Wilson Muyenzi wa WDA arikwerekwa ibyo umunyeshuri yize.

Ku ruhande rwa leta ho isanga kugira igiguhugu gitere imbere bisaba ko haboneka imirimo ku bantu benshi, ikaba ari nayo mpamvu ishyigikira imishinga nk’iyo yongerera ubumenyi Abanyarwanda, nk’uko Wilson Muyenzi, ushinzwe kongera ubumenyi mu kigo cy’igihugu gishinzwe guteza imbere ubumenyingiro (WDA) yabitangaje.

Abagera kuri 33 nibo basoje amasomo bari bamaze amezi atatu biga porogaramu zitandukanye. Banahabwa n’ubufasha bwo kwihugura ku buntu mu bigo bitandukanye bikora ibijyanye n’ibyo bize.

Aya masomo kandi aza yunganira impamyabushobozi za kaminuza, ku buryo uwayize ku isoko ry’umurimo aba ashakishwa.

Emmanuel N. Hitimana