Mu gihe impanuka zikomeje gutwara ubuzima bw’abantu abandi zikabasigira ubumuga ari byo biteza igihombo ku miryango yabo ndetse no ku gihugu muri rusange, polisi y’igihugu ikorera mu karere ka Nyanza yatangaje ko ibitera impanuka bizwi kandi bishobora kwirindwa buri wese aramutse abigizemo uruhare, cyane cyane abakoresha ibinyabiziga mu muhanda.

Supt Prudence Mutemura ukuriye polisi y’igihugu mu karere ka Nyanza avuga ko bimwe mu bitera impanuka harimo umuvuduko ukabije, uburangare, kugendera mu binyabiziga bidaheruka gukorerwa isuzuma, gutwara ibinyabiziga abashoferi basinze n’ibindi.

Yagize ati “Urebye impanuka zabaye muri aya mezi atagera kuri abiri ni ukuvuga ukwezi kwa karindwi ndetse n’uku kwezi kwa munani muri uyu mwaka wa 2014 zatwaye abantu b’ingeri zose barimo urubyiruko, abagabo b’ibikwerere ndetse n’abantu bageze mu zabukuru. Rwose ni igihombo kugira impfu z’abantu 8 mu gihe kijya kwegerana abandi bagakomereka, mufatikanye na polisi mu kurwanya impanuka”.

Polisi y’igihugu isaba abatwara ibinyabiziga kwirinda impanuka.

Umuyobozi w’akarere ka Nyanza, Murenzi Abdallah avuga ko umuntu wishwe n’impanuka aba azize amaherere.

Ati “Ni inde wifuza kugendera ku mbago cyangwa gupfa urupfu rw’impanuka?”. Ibi yabibazaga imbaga y’abantu bari baje kwifatanya na polisi ndetse n’akarere ka Nyanza mu gutangiza ukwezi kwahariwe kurwanya impanuka zo mu muhanda.

Umuyobozi w’Akarere ka Nyanza yasabye ubufatanye bw’inzego zose mu kurwanya impanuka zo mu muhanda, ndetse asaba abagenzi kujya batungira agatoki polisi y’igihugu umuntu wese bigaragara ko ashobora kuba intandaro y’impanuka maze ubuzima bw’abantu bukahagendera ku buryo bw’amaherere.

Bamwe mu bantu bari biganjemo urubyiruko bitabiriye iki gikorwa, bavuze ko bagiye kugira uruhare mu kurwanya impanuka zambura ubuzima abantu babo kandi zishobora kuba zakwirindwa abantu baramutse bakoresheje umuhanda nk’uko biba byasabwe na polisi y’igihugu ishinzwe umutekano wo mu muhanda.

Jean Pierre Twizeyeyezu