Polisi ikorera mu karere ka Bugesera itangaza ko yahise ita muri yombi uwitwa Mwanditsi Pierre Claver wateye ibuye uwo basangiraga, ubu akaba afungiye kuri sitasiyo ya polisi ya Nyamata.

Uku gushyamirana kwabereye mu kabari kari mu mudugudu wa Rugunga mu kagari ka Cyugaro mu murenge wa Ntarama.

Aho afungiye, Mwanditsi yemera icyaha avuga ko kumutera ibuye byaturutse ku businzi dore ko bari bahereye kare basangira biza gutuma bagirana ubushyamirane bararwana.

Agira ati “ndemera icyaha nkanagisabira imbabazi kuko nabikoze ntabigambiriye kuko nabitewe n’ubusinzi”.

Uyu Mwanditsi avuga ko nyuma yo gushwana no kumukubita yahise agira umujinya maze amutera ibuye, undi ahita ajyanwa mu bitaro bikuru bya ADEPR Nyamata ari naho yaje kugwa.

Ubwo iyi nkuru yandikwaga umurambo wari ukiri mu buruhukiro bw’ibyo bitaro mu gihe hagishakishwa umwirondoro we kugira ngo bamenye abo mu muryango we.

Egide Kayiranga