Uyu mugabo avuga ko yari atunze uru ruhushya atazi ko ari urukorano, polisi ikaba ariyo yamuhamagaye maze imubwira ko ari urukorano bityo ko agomba gutanga amakuru yaho yarukuye.

Nshimiyimana aravuga ko uruhushya rwe yarukoreye mu mwaka wa 2010 mu karere ka Bugesera, mu murenge wa Nyamata hakorwa ibizamini mu buryo bwa rusange.

Hagati aho ariko polisi ikorera mu karere ka Bugesera itangaza ko yari imaze iminsi ifite amakuru y’uko hari abakoresha impushya zo gutwara ibinyabiziga mpimbano, akaba ariyo mpamvu bahamagaye uyu mugabo basuzumye uruhushya rwe basanga ari uruhimbano, nk’uko bivugwa n’umuvugizi wa polisi mu ntara y’iburasirazuba, SSP Benoit
Nsengiyumva.

Yagize ati “uruhushya rwe twararutwaye turarusuzuma dusanga ari urukorano, ikindi kandi twasanze inimero rufite yanditse ku mazina y’undi muntu”.

SSP Nsengiyumva aravuga ko uyu mugabo naramuka ahamwe n’icyaha azahanishwa ingingo ya 610 yo mu gitabo cy’amategeko y’u Rwanda ahana ibyaha. ihana umuntu wese ukoresha inyandiko mpimbano abizi.

Egide Kayiranga