Akarere ka Nyagatare ni kamwe mu turere twera cyane n’ubwo kari mu turere dukunze kurangwamo izuba ryinshi. Mu guhangana naryo hatekerejwe uburyo abahinzi bajya buhira imyaka yabo hifashishijwe amazi y’umugezi w’umuvumba uca muri aka karere. Uburyo buzakoreshwa mu kuhira imyaka ni ibyuma bizenguruka bimena amazi ku bihingwa.

Minisitiri Mukeshimana yashishikarije abaturage kumva ko ibikorwa nk’ibi begerezwa ari ibyabo atari ibya Leta bityo bagomba kubifata neza bakabibyaza umusaruro.

Ati “Ibi bikorwa bitwara Leta amafaranga menshi bigomba gufatwa neza kuko inyungu yabyo mbere na mbere ibanza ku muturage. Ntabwo Leta ariyo izaza gusarura ahubwo ni umuturage. Mukwiye kubibungabunga no kubifata neza.”

Guverineri Uwamariya Odette uyobora intara y’uburasirazuba yemeza ko ubu buryo bwo kuhira imyaka imusozi ari igisubizo ku karere ka Nyagatare dore ko gakunze kurangwamo izuba ryinshi rimwe bikagabanya umusaruro, ubu ngo intara y’uburasirazuba ikaba igiye kuba ikigega cy’igihugu koko.

Aba bahinzi bamaze kwibumbira muri koperative Kagitumba border irrigation igizwe n’abanyamuryango 400. Ku ikubitiro muri iki gihembwe cy’ihinga gitaha bakaba bazabanza guhinga imbuto y’ibigori bikunze no kwera muri aka gace.

Muhutu Céléstin yari asanzwe akorera ubworozi mu mudugudu wa Kagera akagali ka Kagitumba. Avuga ko yiteguye neza gutangira guhinga atagendeye ku mihindagurikire y’ikirere dore ko ngo n’ubwo ari ubwa mbere agiye gutangira ubuhinzi yizera ko leta itamutekerereza nabi.

Uretse hegitari 400 zatunganijwe mu mwaka wa 2011 mu tugali twa Rwentanga, umurenge wa Matimba na Nyagatabire ya Musheli, ubu izindi hegitari 500 zirimo gutunganywa mu tugali twa Cyembogo, Kanyonza na Kagitumba tw’umurenge wa Matimba, igihembwe cy’ihinga gitaha abaturage bakazahinga buhira.

SEBASAZA Gasana Emmanuel