Aba bamotari baratangaza ko batunguwe no kubwirwa ko mu bikorwa by’iyo sosiyeti bazahabwamo amafaranga ibihumbi bitanu, bazarihirwa nk’igice cy’umugabane wa Koperative, bakaba bavuga ko nubwo batazi umutungo bari bagezeho bakeka ko ayo mafaranga yaba ari make bagereranyije n’imisanzu batanze ndetse n’andi mafaranga bagendaga bakwa.

Ngo batanze ibihumbi 16 byo kwinjira muri sosiyeti, batanga ibihumbi bine byo kugura umwambaro ubaranga (gilets), bakaba baratangaga n’andi 500frw buri cyumweru babwirwaga ko harimo umusanzu wa koperative 300frw na 200frw akaba ubwizigame bw’umunyamigabane.

Nkurunziza Banjamin umuyobozi wa Koperative KAMOTRACO, akaba ari nawe wayoboraga SOTRAMORWA mu karere ka Kamonyi, avuga ko abo banyamuryango bitiranya imikorere ya Campany n’iya koperative kuko ibyo batangaga ari umusanzu udasubizwa, atari umugabane.

Mu gihe avuga ko Campany yabo yari imaze kugira umutungo ufite agaciro ka miliyoni zisaga 800, ku banyamuryango mu gihugu hose basaga ibihumbi 15, ngo yabwiwe n’abamukuriye ko aya mafaranga azatangwaho umusanzu ku makoperative azaba amaze gukorwa.

Ngo uretse ibyo bihumbi bitanu bizatangirwa buri munyamigabane uzemera kuba umunyamuryango wa KAMOTRACO, isosiyeti irateganya gufasha amakoperative iyashyiriraho amagaraji, ibinamba cyangwa ibindi bikorwa byateza imbere amakoperative.

Ikibazo cy’amaherezo y’umutungo abahoze ari abanyamigabane ba SOTRAMORWA bafite, kigarukwaho n’umukozi ushinzwe amakoperative mu karere ka Kamonyi, Habimana Innocent, uvuga ko mu gihe iyi campany itaragaragaza uruhare rwa buri munyamigane, bibangamira gahunda yo guhabwa ubuzima gatozi bwa koperative yabo.

Aba bamotari bari mu bibazo, batangiye muri 2010 bibumbira mu ishyirahamwe rya ATAMIMORWA, nyuma baza guhinduka Sendika ikora ubuvugizi ya SYTRAMORWA, basobanuriwe ko gukora ubuvugizi bitavangwa no gutwara abagenzi bahinduramo sosiyeti ya SOTRAMORWA, none ubu barashaka kuba koperative.

Marie Josee Uwiringira