Nkuko bamwe mu baturage babitangaza ngo bamaze amezi umunani bakoze kuri iri shuri ariko ntibigeze bishyurwa mu gihe umwenda rwiyemezamirimo wubakisha ishuri amaze kubageramo amafaranga agera kuri 11 098 600frw.

Ishuri riterwa inkunga na Bralirwa riri kubakwa mu kagari ka Rambo, benshi mu baturage bigitangazwa ko bagiye kubakirwa ishuri ry’imyuga bashimiye uruganda rwa Bralirwa ruturanye nabo ko nyuma yo kubaha akazi rugiye no kubaha ishuri ryigisha imyuga abana babo, naho abakuru bakabona imirimo y’amaboko kuri iri shuri.

Nyamara kuva ryatangira kubakwa abaturage barikoraho bavuga ko baheruka guhembwa mu Ugushyingo 2013, abaturage 200 barikoraho bakaba batarongera guhembwa.

Rwiyemezamirimo wubakisha iri shuri Twahirwa Faustin avuga ko abaturage bamaze igihe badahembwa kubera ko nawe atarishyurwa na Bralirwa ngo ashobore kwishyura abaturage, akavuga ko impapuro zishyuza yazishyikirije Bralirwa ariko atarahabwa igisubizo.

Rwiyemezamirimo wubakaga aya mashuri ngo yananiwe kurangiza imirimo none harashakwa undi.

Habimana Martin, umunyamabanga nshingwabikorwa w’umurenge wa Nyamyumba iri shuri riri kubakwamo avuga ko kutishyurwa kwa Twahirwa byatewe nawe wananiwe imirimo bikaba ngombwa ko Bralirwa itamwishyura, ariko ko ubuyobozi bw’umurenge ikibazo bukizi kuburyo rwiyemezamirimo yishyuwe yabanza akishyura abaturage.

Umunyamabanga nshingwabikorw w’umurenge wa Nyamyumba avuga ko harimo gukorwa isuzuma ngo hamenyekane ayo rwiyemezamirimo azishyurwa bitewe n’aho yari agejeje imirimo hanyuma mu yo azahabwa hakurweho ayo guhemba abakozi yakoresheje.

Bamwe mu bakoze kuri izi nyubako bavuga ko ubucyene bubamereye nabi mu gihe bakoze bazi ko bafite akazi kandi bazahembwa aho bafashe imyenda bakaba barafashwe nk’abambuzi.

Sylidio Sebuharara