Nyuma yo gukuramo Borussia Dortmund yo mu Budage ku bitego 3-2 ku giteranyo cya byose muri ¼ cy’irangiza, kuri ubu Real Madrid yo muri Espagne izongera guhangana n’ikipe yo mu Budage itoroshye ariyo Bayern Munich inasanzwe ifite iki gikombe.

Real Madrid yatsinze Dortmund ibitego 3-0 mu mukino ubanza, mu mukino wo kwishyura Dortmund ibasha kwishyuramo bibiri gusa ihita isezererwa. Bayern Munich yo yakuyemo Manchester United muri ¼ ku kinyuranyo cy’ibitego 4-2 mu mikino yombi.

Umukino ubanza uzahuza aya makipe yombi muri ½ , uzabera mu gihugu cya Espagne i Santiago Bernabeu kuri Stade ya Real Madrid, kuri uyu wa 23 Mata 2014. Mu gihe umukino wo kwishyura uzabera Allianz Arena kuri Stade ya Bayern Munich mu Budage kuwa 29 Mata 2014.

Aya makipe yombi azitoranyamo izahura n’izarokoka hagati ya Chelsea yo mu Bwongereza na Atletico Madrid yo muri Espagne, nazo zigomba kwisobanura kuri uyu wa 22 Mata 2014 mu mukino ubanza uzazihuza muri ½ ,n’uwo kwishyura uzazihuza kuwa 30 Mata 2014.

Umukino ubanza uzazihuza ukazabera mu gihugu cya Espagne kuri Stade ya Vicente Calderon ya Atletico Madrid, mu gihe uwo kwishyura uzabera mu Bwongereza kuri Stade ya Chelsea Stamford Bridge.

Atletico Madrid izahura na Chelsea nyuma yo gukuramo FC Barcelone yo mu gihugu cy’iwabo, iyitsinze ibitego 2-1 mu mikino yombi kuko uwa mbere zanganyije 1-1, uwa kabiri Atletico itsinda 1-0.

Chelsea yakuyemo Paris Saint Germain kuko nubwo zanganyije ibitego 3-3 mu mikino yombi, Chelsea yabashije gutsindira igitego i Paris cyayihesheje amahirwe, mu gihe Paris Saint Germain yatsindiwe i Londre 2-0.

Mu mukino ubanza Chelsea yatsinzwe na Paris Saint Germain ibitego 3-1, uwo kwishyura Chelsea itsinda 2-0, iba isezereye Paris Saint Germain ityo. Imikino ya ½ ari nayo ibanziriza uwa nyuma, ikaba izajya ikinwa ku isaha ya saa mbiri na mirongo ine n’itanu za nimugoroba ku isaha ya hano mu Rwanda.

Safari Viateur